GRAN AFLUENCIA DE PÚBLICO Á INICIATIVA "CAFÉ E LIBROS"

Espectacular resposta do público á iniciativa emprendida hoxe por Detrás do Marco "Café e libros" pola cal cada cliente podía levar un libro coa súa consumición. Máis de douscentos exemplares de todos los xéneros literarios, e para todas as idades, estaban a disposición dos clientes do café que responderon con moito interés a este proxecto, que terá continuidade no tempo.

O DÍA 25 DE NOVEMBRO, “CAFÉ E LIBROS” EN DETRÁS DO MARCO

O domingo 25 de novembro (12:00 horas) Detrás do Marco porá en marcha a iniciativa “Café e libros”, pola cal cada cliente do local poderá levarse gratis a casa un libro dos que estarán expostos no café (ata fin de existencias).

 

Este programa ten por obxecto promover a lectura en tempos de crise co agasallo de exemplares de segunda mano que xa foron lidos polos seus donos e son cedidos para esta iniciativa. Desta forma, os libros estarán expostos no local para a súa consulta e os clientes poder cambiar o seu tícket da consumición por un libro ata fin de existencias (e só un  exemplar por persoa).

 

Entre os volumes existentes figuran novelas históricas, libros de terror, novela contemporánea.. Obras para todos os gustos e idades.

 

 

O VENRES 16 DE NOVEMBRO, CONCERTO DE PEPE PIÑA

O venres 16 de novembro (20:30 horas) volverá ao noso local o cantautor galego Pepe Piña, que nos fará gozar dunha noite de boa música e grandes momentos, recordando cancións que todos coñecemos. No seu repertorio, Joaquín Sabina, Silvio Rodríguez, Serrat ou The Beatles, así que será un recorrido moi variado pola música dos 70, 80, 90 e 2000.

MAÑÁ 15 DE NOVEMBRO, INAUGURACIÓN DA EXPOSICIÓN “ABANDONOS BERLÍN”

Antón García amosará en Detrás do Marco a súa obra fotográfica na exposición “Abandonos Berlín”, que permanecerá no local entre os días 15 de novembro e 2 de decembro. Mañá terá lugar o acto de inauguración a partir das 20:30 horas.

 

A mostra de Antón, en branco e negro, amosa a viaxe que realizou a Berlín en agosto de 2011 e foron realizadas en dous sitios: Spreepark e Teufelsberg. Con esta exposición o fotógrafo quere “mostrar outro lado do Berlín histórico un tanto apocalíptico no que as construcións humanas foron esquecidas e a natureza se apoderou delas”.

   Spreepark é un parque de atraccións abandonado situado ao norte de Plänterwald. Foi inaugurado en 1969 cunha superficie de 29,5 hectáreas e vinte anos máis tarde entrou en quebra e quedou a mercé da vexetación. Actualmente estase a reconstruír.

   Teufelsberg foi unha estación de radar espía -traducida como “Montaña do demo”- , que está situada nun outeiro no Grunewald localidade da antiga Berlín Occidental. Creouse durante a Guerra Fría pola NSA (Axencia de Seguridade Nacional) de Estados Unidos co obxectivo de facer escoitas contra os rusos.
Posteriormente a compañía abandonou o proxecto e o lugar quedou arrasado polo vandalismo e usado por okupas para vivir.

Na actualidade foi comprada polo famoso director de cine David Lynch co obxectivo de construír un centro de meditación da seita “Transzendentale Meditation”, á cal pertence.